Të kuptojmë modelet e gjumit të foshnjës tuaj

Një nga gjërat më të rëndësishme me të cilat duhet të mësohen prindërit e rinj është gjumi ose mungesa e tij. Mungesa e gjumit shkon paralelisht me prindërimin; si nënë (ose baba) me një të porsalindur, së shpejti do të kuptoni se sasia e gjumit që bëni varet nga fëmija juaj. Ju mund të dëshironi të flini, por foshnja juaj ka nevojë për ushqim, për të gromësitur, për ndryshim pelene ose edhe vetëm një përqafim (ose dy) në mes të natës. Mund të ndihet sikur fëmija juaj qëndron më shumë zgjuar  se sa fle. Por foshnjat flenë, shumë! Deri në fund të vitit të tyre të parë, foshnjat do të kenë kaluar më shumë se gjysmën e jetës së tyre duke fjetur. Dhe duhet të jeni të kënaqur me këtë gjë, pasi gjumi është i lidhur me aspekte të shumta të zhvillimit të trurit të foshnjës dhe mund të ndikojë ndjeshëm në sjelljen, shëndetin mendor dhe mirëqenien.¹

Gjumi shpesh konsiderohet një aktivitet pasiv, kur në fakt është një proces aktiv. Pavarësisht kohës së kufizuar që ka foshnja në dispozicion për të eksploruar (koha kur rri zgjuar), ka  shumë gjëra që përpunohen gjatë gjumit. Gjumi i foshnjave ndryshon nga i të rriturive dhe karakteristikat unike të gjumit të të porsalindurit tuaj mund të nxisin të mësuarit.Truri i foshnjës suaj po zhvillohet dhe piqet, duke e përgatitur atë për të përpunuar dhe eksploruar mjedisin. Hulumtimet kanë treguar se foshnjat mësojnë dhe përpunojnë reagimin ndaj botës përreth tyre gjatë gjumit.²

Gjumi luan një rol në formimin e kujtimeve, duke konsoliduar materialin që fëmija juaj pa dhe dëgjoi në kohën e shkurtër që mund të ketë qenë zgjuar.²

Ju mund të mendoni se fëmija juaj nuk fle kurrë; ose ndoshta fle shumë vetëm në momentet e gabuara (ju që gëdhini netët pa gjumë e konfirmoni). Por le të shqyrtojmë se çfarë është gjumi "normal". Modelet e gjumit të foshnjave zhvillohen shumë shpejt gjatë dymbëdhjetë muajve të parë të jetës së tyre.Të porsalindurit mund të flenë deri në 18 orë në ditë, me kohëzgjatjen e gjumit të natës duke u rritur në mënyrë të qëndrueshme. Pas disa javësh do të zbuloni se foshnja juaj qëndron zgjuar për periudha më të gjata dhe rrjedhimisht fle për episode më të gjata, zgjimet e natës vinë duke u pakësuar. Megjithatë, bebet janë të ndryshme.  Disa flenë më shumë se të tjerët. Disa për periudha më të gjata, të tjera në episode më të shkurtra. Disa foshnja flenë gjatë natës herët, ndërsa të tjerëve u duhet shumë më shumë kohë (nëse arrijnë të flenë).

Është e lehtë ta konsiderosh gjumin si një sjellje të izoluar – fëmija juaj është ose zgjuar, ose në gjumë. Por ka gjendje të ndryshme të vetëdijes përmes të cilave fëmija juaj bën ciklin disa herë në ditë. Dy janë gjendjet e gjumit; foshnjat kalojnë 50% të kohës së tyre në secilën prej këtyre gjendjeve: ^3,4

• Gjumi aktiv (i njohur edhe si gjumë REM [lëvizja e shpejtë e syve]): frymëmarrja bëhet më e rregullt, foshnja juaj mund të trembet nga disa zhurma
• Gjumi i thellë (ndonjëherë i referuar si gjumë i qetë ose gjumë jo-REM): Foshnja shtrihet në heshtje pa lëvizur; dridhjet dhe lëvizjet e tjera ndalojnë

Ekzistojnë gjithashtu zgjime ose 'gjendje aktive’:⁴

• Përgjumje: Sytë e foshnjës fillojnë të mbyllen dhe ata fillojnë të bien në gjumë
• Sinjalizim i qetë: Sytë e foshnjës hapen gjerësisht, fytyra e tyre është e ndritshme dhe trupi është i qetë
• Sinjalizim aktiv: Fytyra dhe trupi i tyre lëvizin në mënyrë aktive
• E qara: Fëmija qan, ndoshta bërtet; trupi lëviz në mënyra shumë sporadike

Mësimi rreth gjendjeve dhe shenjave të foshnjës është i rëndësishëm pasi ju ndihmon të bëheni më të vetëdijshëm dhe të përgjegjshëm ndaj hollësive të modeleve të gjumit të foshnjës tuaj.³

Megjithëse ekzistojnë modele të përgjithshme të gjumit të foshnjave, jo të gjitha foshnjat janë njëlloj.

Studimet kanë treguar se mjedisi i gjumit, orari i të ushqyerit dhe ndërveprimi nënë-bebe ndikojnë në formësimin e modeleve të gjumit në mënyra të ndryshme. Ndërsa temperamenti i foshnjës mund të çojë në gjumë të copëzuar gjatë natës; stresi i nënës mund të shkurtojë ose të prishë gjumin gjatë ditës. Kjo nënvizon rëndësinë e marrjes parasysh të karakteristikave të foshnjës dhe të nënës kur trajtohen problemet e gjumit në fëmijërinë e hershme.

Me mungesën e gjumit dhe rraskapitjen, mund të ndiheni sikur nuk do të bëni më kurrë një gjumë të mirë. Por ka një sërë ndërhyrjesh të vogla që mund të bëni për të ndihmuar në krijimin e shprehive pozitive të gjumit tek fëmija juaj, si për shembull inkurajimi i fëmijës suaj që të vetë-qetësohet. Aftësia për t'u vetë-qetësuar kur bie në gjumë (të vendoset për të fjetur në fillim të natës dhe për t'u rikthyer në gjumë nëse zgjohen gjatë natës) duket të jetë një përbërës kyç për zhvillimin e modeleve të shëndetshme të gjumit dhe zgjimit.⁵

Foshnjat që vetë-qetësohen përgjithësisht  flenë më mirë sesa ata që vazhdimisht kanë nevojë për ndihmë për të bërë tranzicionin nga zgjuar në gjumë. Vetë-qetësimi mund të forcohet duke vendosur një rutinë gjumi për fëmijën tuaj, veçanërisht zakonet e gjumit gjatë ditës. Gjumi i ditës mendohet se përmirëson gjumin e natës dhe zhvillimin e rutinës për kohën e gjumit, ushqimin dhe larjen.³

Vendosja në gjumë e fëmijës në të njëjtin vend ndihmon shumë. Qoftë në krevat fëmijësh ose në shtratin tuaj, dhënia e ndjenjës së sigurisë dhe vazhdimësisë në vendin ku fëmija juaj fle do të inkurajojë një model më të mirë të gjumit.³

Mendoni gjithashtu edhe idenë e  mbështjelljes. Megjithëse jo të gjitha foshnjat kënaqen duke u mbështjellë (rehatia e mbështjelljes i ndihmon ata të ndihen të sigurt). Studimet kanë zbuluar se pellushi mund t'i qetësojë foshnjat, t'i ndihmojë ato të flenë dhe të vendosen në shpinë, duke  parandaluar kthimin e tyre përmbys ose mbulimin e kokës.^6,7

Nëse e keni dëgjuar ndonjëherë shprehjen e vjetër "të flesh si një bebe", mund të vësh në dyshim vërtetësinë e saj, duke pasur parasysh se sa i trazuar mund të jetë gjumi i të porsalindurit në muajt e parë të jetës. Për të sapolindurit, gjumi ndodh  me ciklin gjumë-zgjim të varur nga nevoja për t'u ushqyer, ndryshuar pelenën dhe për tu përqafuar. Por gjumi nuk është vetëm një aktivitet pasiv. Ju mund të mendoni se foshnja juaj po ëndërron për ushqimin e radhës, por qartësisht ka shumë gjëra që ndodhin brenda kokës së tyre ndërsa flenë.